AdvertImage

डेब्यूमै प्रभाव छाडेका ५ युवा खेलाडी(पुरा जानकारी)

न्यूज ब्युरो २२ पुष २०७७, बुधबार १२:४४
               
AdvertImage                        
डेब्यूमै प्रभाव छाडेका ५ युवा खेलाडी(पुरा जानकारी)
AdvertImage

सगरमाथा सिमेन्ट प्रधानमन्त्री राष्ट्रिय महिला टि२० क्रिकेट प्रतियोगिता २०७७ मा युवा खेलाडीको बाहुल्यता रह्यो । जिल्ला र प्रदेश छनोट हुँदै टोली निर्माण भएको हुँदा प्रदेशको टोलीमा युवा खेलाडीको प्रभाव बलियो थियो ।

प्रतियोगिता सकरात्मक पक्ष नै युवा प्रतिभाको उत्साहजनक उपस्थित थियो । युवा खेलाडीको आर्कषणले नेपाली महिला क्रिकेटमा थप उत्साह थपेको छ । आइतबार भएको फाइनलमा विभागीय टोली एपिएफलाई ६ रनले पराजित गर्दै प्रदेश एकले पहिलो पटक उपाधि जित्न सफल भयो । नेपाली राष्ट्रिय क्रिकेट टोलीकी कप्तान रुविना क्षेत्री बेलबासले युवा खेलाडीको उत्साह देख्दा आफू निकै खुसी भएको बताइन् ।

राम्रो प्रभाव छाडेका यी युवा खेलाडीलाई खेलमा निरन्तरता दिइरहन भने त्यतिनै चुनौती छ । उचित अभ्यास र खेलको कमी भएका युवा प्रतिभा त्यतिकैमा सीमित हुन्छन् की भन्ने डर पनि छ । त्यसको लागि जिल्ला र प्रदेश संघले विशेष ध्यान दिन आवश्यक देखिन्छ । अहिलेका देखिएका युवा खेलाडीलाई राम्रोसँग संरक्षण गर्दै अघि बढाउने हो भने आगमी प्रतियोगिता र दिनमा नेपाली महिला क्रिकेटको विश्वकप खेल्ने सपना त्यति टाढा देखिदैन ।

डेब्यू कुनैपनि खेलाडीको लागि सबैभन्दा उत्कृष्ट क्षणमा पर्दछ । त्यो राष्ट्रिय होस् वा अन्तर्राष्ट्रिय प्रतियोगिता । प्रतिभावान् खेलाडीले आफ्नो क्षमता देखाउन लामो समय र टोलीको नतिजाले भने फरक पार्दैन । कुनैपनि खेलाडीको क्षमता हेर्न धेरै रन हान्न र विकेट लिनैपर्छ भन्ने हुँदैन । उसले मैदानमा देखाउने हाउभाउबाट पनि बुझ्न सकिन्छ । प्रधानमन्त्री राष्ट्रिय प्रतियोगितामा देखिएका युवा खेलाडी अधिकाम्स बलर रहे । ब्याटिङमा सिनियर खेलाडीलैनै संघर्ष गरि रहँदा राष्ट्रिय प्रतियोगितामा डेब्यू गर्दै राम्रो प्रभाव छाडेका ५ खेलाडी र उनीहरुको बारे छोटकरीमा जानकारी ।

जोत्स्निका मरासिनी (गण्डकी)

१३ वर्षिया मध्यगतिकी बलर ज्योत्स्निका मरासिनीको चर्चा यस प्रतियोगितामा सर्वाधिक रह्यो । उनको प्रर्दशन र कलिलो उमेरले उनले नेपाली समर्थक सामू राम्रो चर्चा पाइन् । प्रतियोगितामा तीन खेलमा १० ओभरमा ४५ रन खर्चेर १ विकेट लिइन् । पुस १४ मा कर्णालीविरुद्ध डेब्यू गरिन् । बलिङमा उनले ३ ओभरमा १३ रन खर्चेर १ विकेट लिएकी थिइन् । भने ब्याटिङतर्फ १४ बलको सामना गर्दै ६ रन जोडकी थिइन् । कलियो उमेर अनि मैदानमा परिपक्क खेलाडीको जस्तो आत्माविश्वास उनीमा थियो ।

मध्यगतिमा बलिङ गर्ने उनले लाइन एण्ड लेन्थमा अनुसासन बलिङ गरेकी थिइन् । दोस्रो खेलमा उनको ब्याटिङमा मौका नपाएपनि बलिङमा बागमतीविरुद्ध ३ ओभरमा १३ रन खर्चेकी थिइन् । प्रदेश १ विरुद्ध ४ ओभरमा १९ रन खर्चेकी थिइन् । ब्याटिङमा ११ बलको सामना गर्दा अप्सरी बेगमले उनलाई बोल्ड आउट गरेकी थिइन् । उनको उमेर र शरीरको उचाई हेर्दा क्रिकेट खेल्न सक्छिन् भनेर सुरुमा देख्नेले कमैले मात्र विश्वास गर्न सक्छन् । स्याङ्जाकी ज्योत्स्निकाको उमेर सबैभन्दा कम भएपनि चर्चा सर्वाधिक बटुलेर फर्किन् ।

सुस्मिता भुषाल (लुम्बिनी)

रुपन्देहीकी १४ वर्षिया मध्य गतिकी बलर सुस्मिता भुषालले पहिलो खेलमै प्रदेश २ लाई हराउन प्लेयर अफ द म्याच प्रर्दशन गरेकी थिइन् । प्रदेश २ विरुद्धनै राष्ट्रिय प्रतियोगिताको लागि डेब्यू गरेकी उनले ४ ओभरमा १० रन खर्चेर ३ विकेट लिएकी थिइन् । १४ वर्षकै उमेरमा उनले पहिलो खेलमा राम्रो प्रर्दशन गर्दै यादगार डेब्यू गरिन् । जुन जित सेमिफाइनलमा पुग्ने प्रमुख आधार थियो ।

कर्णालीविरुद्ध ३ ओभरमा २ मेडन राख्दै १ रन खर्चेकी थिइन् । मध्यगतीमा बलिङ गर्ने उनले एपिएफविरुद्ध ३ ओभरमा १४ रन खर्चेकी थिइन् । उनले सेमिफाइनलमा प्रदेश १ विरुद्ध भने १ ओभरमा ६ रन खर्चेकी थिइन् । लमहीमा पिचमा नाम चलेका खेलाडीलाईनै बलिङ गर्न कठिन परि रहेको बेला उनले भने डेब्यू खेलमै उत्कृष्ट प्रर्दशन गर्दै सेमिफाइनलको यात्रा सहज बनाएकी थिइन् ।

विन्दा कटुवाल (बागमती)

१८ वर्षिया युवा ब्याटर विन्दा कटुवालले गण्डकीविरुद्ध डेब्यू गरेकी थिइन् । बागमतीले अस्मिता खरेलको स्थानमा विन्दालाई ओपनिङ पठाएको थियो । विन्दाले उक्त अवसरलाई भरपुर सदुपयोग गरिन् । उनले ५८ बल खेल्दै ३ चौका सहित उक्त खेलमा सर्वाधिक ३८ रनको योगदान दिइन् । उनले पहिलो विकेटका लागि ओपनर कञ्चन श्रेष्ठसँग १०.१ ओभरमा ७६ रनको साझेदारी गरेकी थिइन् ।

देउखुरी क्रिकेट मैदानमा विन्दाले भने पिच र आउटफिल्डको अवस्थालाई बुझ्दै समय लिएर रन जोडेकी थिइन् । जिम्मेवारी ब्याटिङ मैदानमा देखिन्थ्यो । ओखलढुंगा घर भएकी उनले ग्रेट हिमालय क्रिकेट एकेडेमीबाट नियमित क्रिकेट सिक्दै पनि आएकी छिन् । स्पिनर एलिसा लामिछानेको बलमा ठूला सट खेल्नेक्रममा अन्जली विश्वकर्माबाट क्याच आउट हुन पुगेकी थिइन् । दोस्रो खेलमा उनी सुदूरपश्चिमविरुद्ध ७ रनमा आउट भएकी थिइन् ।

निशा पराजुली (कर्णाली)

कर्णालीको प्रर्दशन कमजोर रह्यो । तर १३ वर्षिया स्पिनर निशा पराजुलीले भने राम्रो छाप छोडेर फर्किन् । पहिलो खेलमा एपिएफले २० ओभरमा ४ विकेट गुमाउँदै २ सय ३५ रन बनाएको थियो । खेलभर कर्णालीको प्रर्दशन कमजोर रह्यो । पहिलो विकेटका लागि ओपनर ज्योती पान्डे र सीता राना मगरले ८.३ ओभरमा ९७ रनको साझेदारी गरेका थिए ।

स्पिनर निशाले ज्योतीलाई अन्शु शाक्यबाट क्याच गराउँदै पहिलो सफलता दिलाएकी थिइन् । प्रदेश २ विरुद्ध उनले ४ ओभरमा १६ रन खर्चेर २ विकेट लिएकी थिइन् । उक्त विकेट शोभा आले र सरस्वती चौधरीको थियो । टोलीको कमजोर प्रर्दशनको दबावको बाबजुद पनि उनले आफ्नो प्रतिभा भने खुलेर देखाएकी थिइन् ।

सना प्रविन (प्रदेश २)

बाराकी १४ वर्षिया युवा स्पिन अलराउन्डर सना प्रविनले पुष ११ मा लुम्बिनीविरुद्ध डेब्यू गरेकी थिइन् । शीर्षक्रमका ब्याटिङ कमजोर हुँदा उनले तल्लोक्रममा जिम्मेवारी इनिङ खेलेकी थिइन् । पाँचौं ओभरमा सुस्मिता भुषालले कप्तान सरस्वती चौधरी कटविहाइन्ड आउट गरेपछि प्रदेश २ ले उनलाई पाँचौं नम्बरमा ब्याटिङमा पठाएको थियो ।

सना २० औं ओभरको पहिलो बलमा मधु डिसीले रन आउट गर्नुअघि उनले क्रिजमा ४८ बलमा २१ रन जोडेकी थिइन् । कलिलो उमेर, डेब्यू खेल अनि दबाबमा उनले मैदानमा गरेको कौशल प्रदर्शनले पनि उनको क्षमता देखाउछ । स्पिन बलिङमा उनले राम्रो टर्न पनि गराइरहेकी थिइन् ।

स्रोत :- हाम्रो खेलकुद